हेटौंडा \ हेटौंडा ११ नवलपुरमा रहेको बागेश्वरी महिला बचत तथा ऋण सहकारी संस्थाले १५ औं वार्षिक साधारण सभाको अवसरमा पत्रकार सहित शेयर सदस्य सम्मान गरेको छ । शनिबार संस्थाले सभामा खबर सहकारी डटकमका सम्पादक श्रीराम अर्जुन, संस्थाका कर्मचारी बचत प्रवद्धक शान्ता सापकोटा सहित विभिन्न विधामा शेयर सदस्यलाई सम्मान गरेको हो ।
संस्थाका अध्यक्ष आशा कुमारी अधिकारीको सभाध्यक्षता तथा जिल्ला बचत तथा ऋण सहकारी संघ मकवानपुरका अध्यक्ष कल्पना श्रेष्ठको प्रमुख आतिथ्यतामा सभा भएको थियो । सहकारीले ४० जना जेष्ठ शेयर सदस्यलाई सम्मान गरेको थियो । त्यस्तै, उत्कृष्ट नियमित बचततर्फ गोलाप्रथाबाट पाँच जनालाई पुरस्कृत गरिएको थियो भने उत्कृष्ट खुत्रुके बचत कर्ता पाँच जना, शिक्षा बचतकर्ता २ जना, गहना बचत कर्ता २ जना, जीवन साहारा बचतकर्ता ३ जना, उत्कृष्ट व्यवसायी सदस्य ३ जना, ऋण कारोबार व्यवसायी ३ जना, प्लस टुमा उत्कृष्ट अंक ल्याउने २ जना, सुनौलो भविष्य बचत गर्ने १८ जना बालबालिका, मोवाईल बैंकिङ प्रयोगकर्ता ५ जना, सहकारीको ड्रेस लगाएर सभामा सहभागी जनाउने २ जनालाई सम्मान तथा पुरस्कृत गरिएको थियो ।
सहकारीले पाँच जना सफल व्यवसायीलाई पनि सम्मान गरेको छ । च्याउखेती गर्ने कान्छीमाया मुक्तान, सुन व्यवसायी शर्मिला विक, गाईपालन गर्ने सुनिता बर्तौला, च्याउखेती गर्ने देवीमाया श्रेष्ठ, चटपटे पसल व्यवसाय गर्ने लक्ष्मी अर्जेललाई सम्मान गरिएको थियो ।
तीन करोड ९ लाख ७१ हजार ९ सय शेयर पुजीँ रहेको सहकारीले आफ्ना सदस्यलाई २१ करोड ४४ लाख ९ हजार ९९४ रुपैयाँ कर्जा लगानी गरेको संस्थाका प्रमुख कार्यकारी अधिकृत शर्मिला श्रेष्ठले बताइन् ।
सभामा वडा नम्बर ११ का अध्यक्ष जुना दाहाल, वडा सदस्य गोपिनी सापकोटा, जिल्ला सहकारी संघका सदस्य बिमला कार्की, नेफ्स्कुन फिल्ड कार्यालय उपसमिति सदस्य राजु गौतम, नवयुवा साकोसका अध्यक्ष फुलमान श्रेष्ठ, उपयोगी सहसाब्दी साकोस अध्यक्ष दिनेश विडारी, सल्लाहकार सीताराम बर्तौला लगायतको आतिथ्यता रहेको थियो ।
