
हेटौंडा \ हेटौंडा २ देवीपथमा रहेको नमूना प्रगति बचत तथा ऋण सहकारी संस्थाको २६ औं स्थापना दिवसको अवसरमा हेटौंडामा रहेको मामाघर नेपाललाई ११ हजार १ सय ११ रुपैंया सहयोग हस्तान्तरण गरिएको छ ।
बुधबार एक कार्यक्रमको आयोजना गरी मामाघर नेपालका कोषाध्यक्ष नवीन सिलवाललाई ११ हजार १ सय ११ रुपैंया बराबरको चेक हस्तान्तरण गरिएको हो । सहकारीका अध्यक्ष मिठ्ठाराम दाहालको सभाध्यक्षतामा भएको कार्यक्रममा बागमति प्रदेश सहकारी विकास बोर्डका उपाध्यक्ष तथा संस्थाका सल्लाहकार नारायण प्रसाद देवकोटाको प्रमुख आथित्यता रहेको थियो ।
कार्यक्रममा जिल्ला बचत तथा ऋण सहकारी संघ मकवानपुरकी अध्यक्ष कल्पना श्रेष्ठ, मकवानपुर जिल्ला सहकारी संघका व्यवस्थापक गोविन्द दाहाल, राष्ट्रिय सहकारी बैंक हेटौंडा शाखाका प्रमुख रामेश्वर अर्याल, शिक्षक हित बचत तथा ऋण सहकारी संस्थाका अध्यक्ष सिताराम दाहाल लगायत संस्थाका संचालक समिति, लेखा समिति, शेयर सदस्य, कर्मचारीहरूको उपस्थिति रहेको थियो ।
सहकारी संस्थाले हेटौंडा २ मा मुख्य कार्यालय र हेटौंडा १७ मा सदस्य सम्पर्क कार्यालय मार्फत सदस्यहरुलाई सेवा दिइरहेको व्यवस्थापक बद्री प्रसाद भण्डारीले बताए । उनका अनुसार संस्थामा हाल २ हजार ६ सय २ जना सदस्यहरुसँग कारोबार गरिरहेको बताए । संस्थाले हरेक वर्ष साउन २४ गते विविध कार्यक्रम गरी स्थापना दिवस मनाउँदै आएको छ ।