September 25, 2022
खवरसहकारी |  चैत्र १०, २०७८  | 

बागमती प्रदेशमा बर्ड फ्लूका कारण ३ करोड बराबरको आर्थिक क्षती भएको छ । गत माघ १६ गतेदेखि प्रदेशका विभिन्न जिल्लामा देखिएको बर्ड फ्लू रोगबाट देशभर ६ करोड बराबरको आर्थिक क्षती भएको छ भने त्यसको आधा भाग बागमती प्रदेशमा भएको कृषि तथा पशुपन्छी मन्त्रालय बागमती प्रदेशले जनाएको छ ।

मन्त्रालयले बुधबार हेटौंडामा पत्रकार भेटघाटमा हालसम्म प्रदेशका ६ जिल्लाका पन्छीहरूमा बर्ड फ्लू रोगको संक्रमण देखा परेको जनाएको छ । प्रदेशका मकवानपुर, चितवन, काठमाडौं, भक्तपुर, ललितपुर र सिन्धुपाल्चोकका कृषकहरुले पालेका पन्छीहरूमा बर्ड फ्लू रोगको संक्रमण देखापरेको मन्त्रालयले जानकारी दिएको छ ।

मन्त्रालयका अनुसार हालसम्म बर्ड फ्लू रोगको संक्रमण देखिएका जिल्लाहरुमा ५८ हजार २६१ वटा पन्छी, २२ हजार ३४ वटा अण्डा र ११ हजार ४३९ किलो दाना नष्ट गरेको छ । जसमा काठमाडौंमा १९ हजार ५०६ वटा पन्छी, ५ हजार ६५२ वटा अण्डा र ४ हजार १०८ किलो दाना नष्ट गरिएको छ । त्यस्तै चितवनमा ९ हजार ६७० पन्छी, २ हजार ३८६ वटा अण्डा, १ हजार ५०० किलो दाना, भक्तपुरमा २४ हजार ३१९ वटा पन्छी, १३ हजार ९० वटा अण्डा, २ हजार ९०० किलो दाना, मकवानपुरमा ३१६ वटा पन्छी, १६ वटा अण्डा, ८२ किलो दाना, ललितपुरमा २ हजार २६२ वटा पन्छी, ९०० किलो दाना र सिन्धुपाल्चोकमा २ हजार १८ वटा पन्छी, १ हजार ९५० किलो दाना नष्ट गरिएको छ ।

६ जिल्लामा बर्ड फ्लू रोगको संक्रमणको कारण ५७ हजार ११४ वटा विभिन्न जातका कुखुरा नष्ट गरिएको कृषि तथा पशुपन्छी मन्त्रालयका सचिव शरण कुमार पाण्डेले बताए । उनले क्षती व्यहोरेका कृषकहरुलाई संघीय र स्थानीय सरकारसँगको सहकार्यमा क्षतिपूर्ति समेत दिने तयारी भइरहेको बताए । संघीय सरकारले तोकेको मापदण्ड र नीति अनुसार क्षती व्यहोरेका कृषकहरुलाई राहत स्वरुप क्षतीपूर्ती दिने सरकारको योजना रहेको उनको भनाइ छ ।

Leave a Reply

Your email address will not be published.